SHC member tharte lak luh an ni

Sinlung Hills Council (SHC) member atana thlan thar mi 12-te chu nimin khan Aizawl DC pisaah lak luh an ni. Member-te'n protem speaker atana an thlan HC Lalmalsawma, Zohmun bial aṭanga thlan tlin chu Aizawl bawrhsap Vanlalngaihsaka'n a lâk luh hnuah, HC Lalmalsawma hian member dangte a la lut ve leh a ni.

SHC member lak luh inkhawm neih zawh hian chief executive member (CEM), chairman leh deputy chairman thlan nghal a ni a; CEM atan Sakawrdai North bialtu Lalthlamuana Hmar thlan niin, chairman atan Ṭinghmun bialtu Lalmalsawna Darngawn leh deputy chairman atan Suangpuilawn bialtu Lalvenhima Hmar thlan an ni.

CEM Lalthlamuana Hmar chuan executive member (EM) atan Ratu bialtu H Lalengzauva, New Vervek bialtu Lalnuntluanga leh Vanbawng bialtu Ricky Lalremsanga a ruat a; EM pakhat la ruat belh theih chu ni danga puan turin a dah.

SHC-ah hian elected member 12 an awm a, nominated member pahnih la ruat leh tur niin, chu'ngte nen chuan an vaiin member 14 an ni ang. Nominated member atan hian HPC(D) chairman ṭhin H Zosangbera (L) fanu Melody Lalchhuangzeli, Sakawrdai ruat a ni tawh a; post khat la ruak chu ni danga hnawhkhah tur a nih thu CEM chuan a sawi.

Tarlan tawh angin, November 5, 2019-a SHC inthlan zawh tâkah khan MNF leh HPC ṭang dun chuan seat 12 zinga seat 10 lain sorkarna siam turin hnehna an chang a, independent candidate pahnih an tling ve bawk. Ruahmanna an siam dan chuan, SHC sorkar siam turah hian MNF-in chairman leh executive member pathum an chang a, HPC-in CEM, deputy chairman leh executive member pakhat an chang thung.