KHAWTHLIR

Lawngtlai Chandmary Venga Excise & Narco­tics department (END) pisa thar chu nimin khan Lawngtlai East bialtu MLA H Biakzaua, Agriculture Development Board vice chairman-in a hawng. H Biakzaua chuan, END-a thawktu awm thar turte chu ram, mipui leh khawtlang tana ṭhahnemngai taka thawk turin a chah. Lawngtlaia Excise & Narcotics station thar hi inspector-in a awp dawn a, sub-inspector pahnih, driver pahnih leh thawktu dang 13 an awm ang.

Mizoram Truck Driver Association (MTDA) chuan November 7, 2019 khan State Trai­ning Centre, Tanhrilah General Assembly vawi 26-na an hmang a, Food, Civil Supplies & Consumer Affairs minister K Lalrinliana'n a hmanpui. Minister hian thu a sawi bakah, MTDA inenkawlna turin Rs. 10,000 a pe a; FCSCA Director-in thu a sawi bawk. Inkhawmpuiah hian Mizoram hmun hrang hrang aṭangin mi 1,000 chuang an kal a, an pawl office bearer thar tur an thlang a ni.

TC Jonunsanga Lehkhabu ziah 'Lalveng Tlang' tih chu nimin khan Ai­zawl Press Club-ah Assembly speaker Lalrinliana Sailo-in a tlangzarh. Lalrinliana Sailo chuan, thu ziak mite'n Mizo hnam insuihkhawmna tur leh inunauna hlen chhuak turin mawhphurhna lian tak an nei tih a sawi a, "Mizo hnam hmun hrang hranga awmte inzawmkhawm a, hmasawnna kawng zawh mup mup hun ka thinlung hian a nghakhlel hle a ni," a ti.

Synod Inkhawmpui vawi 96-na chu December 3-8, 2019 chhungin Mission Veng biak-inah neih a ni dawn a, Mizoram Synod hotute leh inkhawmpui thlengtu turte ngawrh takin an inbuatsaih mek. Synod Inkhawmpui atan hian department hrang hrangte inruahman lâwk­na committee meeting chu October 21, 2019 aṭang khan neih a ni tawh a, committee hrang hrang an ṭhu mek zel. Meeting hrang hrangte hi Synod moderator Rev. R Lalhmingthanga'n a kaihruai ṭhin a ni.