Central YMA leh MJA hruaitute inkâwm
Central YMA hruaitute sâwm angin nimin khan Mizoram Journalists' Association (MJA) Gen.Hqrs. hruaitute chu CYMA President Room-ah lengin, an inkâwm a; Zo hnahthlak inpumkhatna chungchang, Chakma leh Bru chungchang leh thu pawimawh dangte an sawiho.
Inkawmna kaihruaitu CYMA president Vanlalruata chuan, YMA chu a huap a zau a, chhangchhiat chángte a awm ṭhin tih sawiin, "Thu har deuh neih chang pawh a awm. Heng hunahte chanchinbumi, MJA-te'n min ṭawiawm ṭhinnaah lawmthu kan sawi a ni. YMA hi ram leh hnam tan pawl pawimawh tak a nih rualin, hruaitute hi mi fing leh fel ber ber kan nih loh avangin finchhuah kan mamawh a ni," a ti a; MJA nen inkawmho zeuh zeuh an duh thu a sawi.
MJA president Zonunsanga Khiangte pawhin thu sawiin, YMA-in rei tak chhung ram leh hnam humhalh kumpuana a neih tawh chu hlamchhiah chuang loa kumpuan atana 'Zirna uar' thlan a ni chu MJA-te an lawm hle tih a sawi a, "All India service leh central service-ah Mizote kan lang ve mang ta lo hi rualawh a ná a, zirna uar hi beihpui thlak a ngai hle a ni," a ti.
Zonunsanga Khiangte chuan, phone leh social media-in Mizo ṭhalaite a tibuai ta lutuk leh lehkha chhiar an hlamchhiah ta lutuk chu MJA-in an vei ṭhin thu sawiin, "Zirna uar kum puan hian lehkha chhiar tam tura inzirtir keng tel se, YMA hmalaknaah pawh tel se a duhawm hlein a rinawm," a ti a; tunlai Mizo ṭhalai, ṭhangthar zawkte chu hriat zauna lamah an ril tawk tawh loa a lan thu leh, YMA-in theihtawp a chhuah chuan rualelna lamah hmasawnna hmuh a beiseiawm thu a sawi.
MJA President chuan, YMA hmalakna hrang hrangah chanchinbumite ṭangkai theihna a awm chuan theihtawp chhuah an inhuam thu sawiin, "Zirna uar hmalaknaah mipui hnena puanzar tur awmte chu MJA pawhin a tih turah a ngai a ni," a ti a; zirna ngawr ngawr piah lamah, aia upa zah leh nun dan mawi hrim hrim inzirtirte chu YMA kumpuanin a keng tel turah an ngaih thu a sawi bawk. Inkawmnaah hian CYMA office bearer-te an kim a, MJA lam chu executive committee member chin an tel a ni.