Educational Survey Report tlangzarh

Mizoram Middle School Teachers' Association (MSTA) hnuaia Academic Sub-Committee buatsaih, Educational Survey Report, 2019 chu nimin khan SCERT Auditorium-ah SCERT director Laldawngliani Chawngthu-in a tlangzarh.

Tlangzarhna inkhawma tarlan dan­in, survey hi thla 10 chhung mi 1,135 kawmna aṭanga buatsaih a ni a; inhlawhfa ṭhin te, sumdawng lian te, eizawnna tênau deuh nei te, firm leh company hnuaia thawk te, centre leh jail-a awm mek te, ruihhloin a tihbuai mekte leh hna mumal thawh nei loa khawlaia lêng vel ṭhinte kawm a ni.

Survey report aṭanga a lan dan chuan, hna thawk peih leh firm leh company-a thawk zingah sorkar primary school leh middle school aṭanga  inzir chhuak an tam hle a; hna sang thawk leh lehkhathiam hna nghet neite bakah, Sap ṭawng hman ṭulna firm leh company-a thawkte zingah pawh sorkar sikula inzir chhuak an tam zawk hle bawk.

Ṭhalai intichangkang, hna nei lem loa léng vâk vel zingah erawh chuan sorkar sikula inzir chhuak an awm meuh lo a; hna sang thawk leh lehkhathiam takte zingah ruih theih thila buai an awm mang lo. Survey report tlangzarhna inkhawm hi MSTA president Rosangzuala Ralte-in a kaihruai a; School Education department, Health & Family Welfare department, Social Welfare and Tribal Affairs department leh Police aiawhte bakah, tlawmngai pawl leh zirna péng hrang hranga hruaitute chu an tel a ni.