UPSC exam hmachhawn tum ṭanpui ngaite tan MLA a inhawng

Thingdawl High School chuan nimin khan an kum 50-na champha, golden jubilee an lawm a, bialtu MLA Andrew H Thangliana'n a hmanpui. MLA chuan, UPSC exam hmachhawn tum, ṭanpui ngaite tan a inhawn reng thu a sawi.

Andrew H Thangliana chuan, IAS ni thei Mizo 44 an awm tawh tih sawiin, "A tam zawk chu an pension tawh a, IAS kan neih hnuhnun ber chu kum 2012 kha a ni tawh," a ti a; Mizo zingah IAS leh all India service-a tling thei an awm loh reng chuan Mizoram sorkara hotu lu ber ber chu hnam dang an la ni dawn a, Mizote hmabak a thim chho dawn tih sawiin, "Kan ram leh hnam tan UPSC paltlanga IAS, IPS, etc. nih tuma lehkha zir a ngai. IAS coaching kal turte in awm a nih chuan ṭanpui tur che u in ka inhawng reng a ni," a ti.

Tuirial bial chhunga college awm­chhun Kawnpui College-a principal leh thawktu mi pakuate hlawh MLA fund aṭanga an tumsak mek thu sawiin MLA chuan, "Kawnpui Higher Secondary School-a LDC hlawh pawh keima MLA hlawh aṭangin kan tumsak mek bawk a ni," a ti a; sikul building ban leh beam V/C-te'n an khawih tawh, chhunzawm ngaihna awm lo chu sak puitlin a nih theih nan proposal an thehluh mek thu a sawi.

Andrew H Thangliana chuan, India sorkar leh Mizoram sorkarin zirna an ngai pawimawh tih sawiin, "Keini pawhin zirna hi kan ngai pawimawh em em a ni," a ti a; inthlan campaign laiin 'Kan sorkar chuan zirlaite student loan kan pe ang a, guarantor-ah sorkar a ṭang ang' tia an intiam thu sawiin, "Zirnaah hian kan bial chhungah theihtawp kan chhuah mek a, hmachhawp pawh kan nei chho zel a ni," a ti.

Tuirial bialtu MLA chuan, Thing­dawl khuaa Nursing School kawt tiêng turin solar street light an ruahman mek thu te, an bial chhunga sikul thawm ṭhat ngaite a tahtawla thawm ṭhat tum a nih thu te, Thingdawl M/S-I Hindi teacher hlawh tur naupangte'n an thawh khawm chu ZPM-in an vei em avangin MLA fund aṭangin Hindi teacher hlawh tur an ruahman mek thute a sawi bawk.