Mi kut tuarin sipai pakhat a thi; Police-in mi pariat an man tawh

Zakaria Lalhriattluanga (29) s/o VL Duailova, New Builum, Kolasib district chu September 20, Pathianni zan dar 6:30 vel khan Bualpui daiah mi kut tuarin a thi. He thihna kaihhnawihah hian Kawnpui Police-te chuan mi pariat an man tawh.

Thu dawn danin, Zakaria Lalhriattluanga hi Assam Regiment a ni a, chawlh hmang turin Pathianni khan a rawn haw a, a ṭhianpain truck-in Lengpui Airport-ah a lo hmuak a ni. Airport aṭanga an haw lam chu ṭhian ho intihlim haw lam, Kolasib lam aṭanga pick-up-a kalte nen Coffee Board, Bualpui bulah an intibuai a, kut an inthlaknaah Zakaria chu a thi a ni. A ṭhianpa erawh a hliam na lo.

Zakaria Lalhriattluanga ruang hi Police leh Forensic Science Laboratory lamin an buaipui zui a; Pathianni zan khan an inah lumen a ni a, nimin khan Kolasib District Hospital-ah a ruang endik a nih hnuah chawhnu dar 2:30 velah vui a ni.

Zakaria thihna avang hian Kawnpui Police-te chuan mi pariat - mipa panga, hmeichhia pakhat leh kumtling lo mi pahnih an man a, Kawnpui Hmarvenga cheng vek an ni. Kum 18 tling tawhte chu nimin tlai khan Kolasib District Jail-ah dah luh an ni a, kumtling lote chu Juvenile Justice Board hnenah hlan an ni.

Thil thleng chungchangah hian Kawnpui Police Station-ah thubuai ziah luh a ni a; Police-te'n an chhui zui mek a, mi dang man belh tur an awm dawn leh dawn loh hriat a ni lo.

Bualpui dáiah hian Zakaria te hi lirthei dang nen an inpêl tur chu hnam dang khalh truck a inzep a, lirthei aṭanga chhukin an hau a; hnam dang truck a tlan liam hnu lawkah pick-up a thleng ve leh a, an intibuai zui ta niin an sawi.