MNF-in Martarte Ni an hmang

MNF party chuan nimin khan Mizoram hmun hrang hrangah 'Martarte Ni' an hmang a; a hmanna pui ber Aizawlah chuan Mizo Hnam Rûnah party president Zoramthanga hoin an hmang.

Zoramthanga chuan, hnam martarte hlutna leh ropuizia sawiin, "Ṭhangthar zelte pawhin ram tana zalenna sualtu Mizo hnam sipaite leh hnam martarte ngaihsan leh hlut nachang an hre zui zel leh an ngaihven thar nasa hi ropui ka tiin lawmawm ka ti tak zet. Hnam sipaite leh he hnam tana martarte inpekna leh hnathawh te, engkim huama an inhlan ralna kha a ropuiin a zahawm em em. Vawiina la damte leh ṭhangthar lo kal zel turte pawhin zah tak chunga kan hriat reng leh thu dik hre tura kan zir chian a pawimawh," a ti.

Zalenna sualtu Mizo hnam sipaite leh martarte thisen zara Mizoramin thil tam tak a hlawh chhuah tawhte chu a hlut thu sawiin Zoramthanga chuan, "Inremna a awm theihna tura kohhran, political party, NGO, ram mipui leh kan hnam sipaite'n kan mipuite ngenna avanga inremna lo awm ta leh an lo hlawh chhuah kha a hlu em em. Hengte hi kan thinlungin a theihnghilh ngai lo a, ram tana nunna hlantu martarte thisen hi Mizoram tan a luang thlawn ngai dawn lo," a ti a, martarte zahna chibai bûk turin mipui a sáwm.

MNF President chuan, chief minister leh an khingpui ṭhenkhatin MNF movement leh Mizoram Peace Accord (Memorandum of Settlement) sawi nêp leh sawi hnâwm tum ṭhin mah se, hnam sipaite'n ram leh hnam tan nunna thàpa zalenna an sualna leh martarte thisen hlutziate a dal phah dawn loh thu a sawi a, "Inremnaa tel ve lo, a engamah hre tak tak lote lo sawi nêp tum ve ngawt chi a ni lo. Peace Accord-in a hlawh chhuah Article 371(G) te, kan ILP insawhnghehna tiderthawng thei zawnga ZPM sorkar chet duh dan hi a demawm," a ti.

Serchhipa Martarte Ni hmanpuitu MNF working president Tawnluia chuan CM Lalduhoma thusawi a chháng a, "Kan CM-in law zirlaite hmaah MNF leh Home Ministry inremna chauh a ni. MNF-te hi Mizoram aiawh a ni lo, a ropui chiam lo ve a ti duh inremna pawh tei têt a tum lui ngar ngar a ni. ILP pawh sorkar laipuiin an duh hun hunah an hlip thei a ti duh," a ti a; CM-in dâwih aw, tlanchhe aw a chhuah niin a sawi.

Martarte Ni hi MNF senior vice president Dr R Lalthangliana, MLA-in Lungleiah a hmanpui a; MNF vice president Vanlalzawma'n Saitualah, vice president pahnih Lalchamliana leh D Thangliana ten Kolasib-ah, treasurer Lalruatkima'n Khawzawlah an hmanpui bawk. Martarte Thlanmualah zahna pangpar dah a ni a, martarte sûn nan minute khat chhung ngawi rengin an ding a ni.