Septic tank siam vek turin hriattir

Aizawl Municipal Corporation (AMC) chuan thuchhuah siamin, AMC huam chhunga in, bazar (market/mall), hotel, hostel, homestay, restaurant, thingpui dawr, sorkar pisa, zirna-in leh pawl pisa zawng zawngah a hmangtu milin septic tank (soakpit nei) siam vek turin a hriattir.

AMC chuan, Aizawl chu páwnlêra inthiar awm lohna, Open Defecation Free Plus (ODF+)-ah hlan kai tawh a nih thu an tarlang a, "Septic tank rimchhia/enkawl ṭhat loh chungchangah mimal leh vantlangin harsatna an tâwk a nih chuan Mizoram Municipalities Acts, 2007 (As amended in 2015) Section 155 & 164 hmangin action lak a ni ang," an ti.

Tuichhia leh in chung tuite mimal leh vantlang tana harsatna thlen theia kawngah emaw, mumal lo taka paih/luantir phal a nih loh thu leh, chutianga ti an awm chuan AMC Building Regulation, 2012 No. 37 (i), (ii) & (i) leh 38 hmangin action lak a nih dawn thu an tarlang bawk.