KHAWTHLIR

NITI Aayog member kâwm

Chief minister Lalduhoma chuan nimin khan a pisaah NITI Aayog member (i/c NE) Dr Joram Aniya a kâwm a; Mizoram hmathlir tihlawhtling turin NITI Aayog thawhpuina an mamawh reng dawn thu a sawi. Dr Joram Aniya chuan, Mizoram hmasawnna tura hmalakna tinrengah an thawhpui tlat tur thu a hrilh.

Ngopa tlawh

National Human Rights Commission special rapporteur Sayeed Ahmed Baba chuan nimin khan Saitual district-a Ngopa PM Shri School Primary SchooI-II, Anganwadi Centre-I, EMRS School leh Hliappui Ginger Processing Unit te a tlawh. Sikul leh anganwadi centre a tlawhnaah hian zirtirtute chu naupangte dinhmun leh an harsatna tawhte a zawt a, naupang enkawlnaah theihtawp chhuah zel turin thawktute a chah.

Lirthei chhiah pe lo 15,479

Champhai District Transport Officer chuan Champhai district-ah lirthei chhiah pe lo 15,479 a awm thu a tarlang a, "Champhai district-a mimal leh sumdawnna lirthei neitu zawng zawngte a rang thei ang bera chhiah pe vek turin kan inngen a, khauh taka hmalak tum niin, chhiah pe lote hi man chhuah an nih chuan chhiah bakah compounding fine leh penalty chawitir an ni ang," a ti.

Chawimawina hlan

Lunglei District Sports & Youth officer Rozamliana chuan nimin khan a pisaah 2026 Women's Hockey Junior Asia Cup-a India tana khel leh champion F Lalbiaksiami, Lunglei Electric Veng chu thingpui inpuiin, chawimawina a hlan. F Lalbiaksiami hi Lunglei District Hockey Association hruaitute'n an ṭawiawm a ni.

In saknaah tla hlum

Agape Laltlingzova (33) s/o Michael Laldingliana, Upper Republic chu nimin chawhma dar 9 vel khan hna an thawhna, an venga in sakna aṭangin a tla a, ká chhawn lohin a thi. Agape Laltlingzova ni vawiin chhun dar 12-ah vui a ni ang.