Aizawlah 'Strengthening SITs to drive Viksit North Eastern Region' zirhona

NITI Aayog chuan nimin khan hmarchhak state tina State Institution for Transformation (SIT) pualin Mizoram Legislative Assembly Annexe conference hall-ah 'Regional Workshop - Strengthening SITs to drive Viksit North Eastern Region' an buatsaih a, chief minister Lalduhoma'n a hawng.

Chief Minister chuan, NITI Aayog-in state support mission (SSM) hmanga Mizoram hma a lakpuina a ṭangkai thu sawiin, "Mizoram SIT a tichak a, plan kan siamnaah te, a taka kan kalpuinaahte sorkar laipui hmathlir milin hma kan lak theih phah. NITI Aayog Governing Council hnuhnung berah Mizorama SSM kalpui zel turin ka dil a, Mizoram Assembly-ah pawh SSM kan mamawhzia ka sawi tawh," a ti a; a dilna ngai pawimawha NITI Aayog-in kum nga dang atan SSM an pawtsei chu a lawm thu a sawi.

Mizoram kum 2047 atana hmathlir a tlangzarh thu sawiin Lalduhoma chuan, "Kum 2047-a India GDP-a 1% tal thawh ve theih kan tum a, kan tum hi a sang hle. Tum ram neih ringawt a tâwk lo a, a taka tihlawhtling tura ke kan pên a ngai. Kan tum ram thleng tur hian kan economy ruhrel thlak a ngai tih kan hria a, kan tum ram min hruai thleng ngei tur ruahmanna SIT hmangin kan siam a, chumi hre chunga ke kan pên theih nan minister zawng zawng tan intuaitharna buatsaih kan tum," a ti.

Chief Minister chuan, hmarchhak state-te'n Viksit Bharat hmathlir tihhlawhtling turin anmahniin engkim an ti vek thei lo tih sawiin, "Kan ṭanho a, kan thawhho zel a ngai. Mizoram phei chu international border pahnih kárcheh kan ni a, hmarchhak bial huapa hma kan lakho a ṭulna a tam hle," a ti a; zirhona chuan hmarchhak bial anga thawhhona turah rah ṭha a chhuah ngei a beisei thu a sawi.

Zirhona hawnna inkhawmah hian NITI Aayog SSM mission director Dr KS Rejimon, NITI Aayog member Dr Joram Aniya, chief secretary Khilli Ram Meena leh Plannning secretray Vanlaldina Fanai te pawhin thu an sawi a; NITI Aayog-a mithiamte'n thupui hmangin kal khawmte thil pawimawh an zirtir a ni.