Ramri kaltlanga sumdawnnaah khauh taka dan kenkawh an rêl

Lawngtlai bawrhsap Donny Lalruatsanga kaihhruaiin nimin khan a pisaah sorkar hotu te, sipai hotu te, tlawmngai pawl leh MJA aiawh ten dan loa ramri kaltlanga sumdawnna leh bungraw phurh tihtawp a nih theih nana hmalak dan tur an ngaihtuah a; dan leh thupek kenkawh kawngah khauh taka hmalak an rêl.

Ṭhutkhawmah hian Additional SP, Taxation Officer (LADC), Assam Rifles, Central YLA leh YLA, AOC Branch aiawhten an hmalak dante an sawi a, hmalakna turte sawiho a ni. District Administration, Mizoram Police leh LADC ten theihtawp chhuah se, a bik takin ramria awm YLA branch leh NGO dangte pawhin theihtawp chhuah a pawimawh a, thawhhona ṭha neih chhunzawm zel ni se, an ti.

Mizoram chhung leh páwn aṭanga lirthei bo report eng emaw zat bawhzui a nih tawh thu leh KMMTTP kawngpui zawha Zorinpui kaltlanga Myanmar nena sumdawnna kalpui ṭhinah hmalakna tur a tam hle tih an pawm. Hma lam hunah sumdawnna hmun lian leh pawimawh ber a la nih dawn avangin dan leh thupek kenkawh kawngah khauh taka hmalak an rêl.

Donny Lalruatsanga chuan, sumdawnnaah dan mumal tak zawm a nih theih nan theihtawp chhuah a ṭul thu a sawi a, "Lawngtlai district aṭanga Myanmar lama bungraw phur leh sumdawnna kalpui ṭhinte'n dan ang thlapin an kalpui em tih uluk zawka endik bakah, dan bawhchhiate dan anga hrem an ngai," a ti.

India khua leh tui ni lo, lirthei khalh leh mi hming hawha lirthei lei bakah, lirthei rûkbo leh zuar chhawng an awm ṭhin nia sawi awm chu uluk taka chhui chian a nih tur thu Bawrhsap chuan sawiin, "Lawngtlai district hi international border-a awm a nih angin, khauh zawka dan leh thupek kenkawh a ṭul," a ti a; District Administration-in theihtawp a chhuah zel tur dawn a, sorkar thawhpui turin pawl hrang hrangte leh mipui a sáwm a ni.