Kuminah Champhai district-ah nau piang 1,084 leh mitthi 353

Champhai bawrhsap Mohammad Aaquib, district registrar ni bawk kaihhruaiin nimin khan Civil Registration System (CRS) of Births & Deaths hnuaia District Coordination Committee an ṭhu. Champhai district-ah kuminah nau piang 1,084 leh mitthi 353 chhinchhiah a nih tawh thu tarlan a ni.

Ṭhutkhawma tarlan danin, Champhai district-ah hian registration unit 67 (institution pariat leh local unit 59) a awm a, a din tirh aṭanga nau piang (live birth) chhinchhiah tawh zat chu 70,072 a ni. Kumin 2026-ah September 20 thlengin nau piang 1,084 ziah luh a ni tawh a; kum 2024 RBD Annual Publication-ah birth rate 27.64 a ni a, district mipui 75.3%-in birth registration an ti tawh.

Champhai district-a sorkarin mitthi a chhinchhiah tawh zat chu 8,886 niin, kumin bikah mitthi 353 ziah luh a ni a, death rate 9.83 a ni. Infant mortality rate (IMR) chu 7 a ni a (nau piang 1,000 zelah 7 an thi tihna), Mizoram puma IMR san lamah pangana a ni mek.