Kawnpui-in thuphá an cháwi

Kawnpui VC-I leh Kawnpui Hmarvenga pawl hrang hrangte chuan thuchhuah inṭâwm siamin, an khawtlang ṭhalai zinga mi ṭhenkhat chêtna avanga Zakaria Lalhriattluanga, New Builum a thi chu pawi an tih thu leh, lusûn chhungte an tawrhpui tak zet thu an tarlang.

Kawnpui VC-I leh Kawnpui Hmarveng NGO-te chuan Zakaria thihna chungchangah ngaihdam an dil tih tarlangin, "New Builum khawtlang mipui leh lusûn chhungte lakah thupha kan chawi a; New Builum chauh ni lo, Mizoram chhung leh páwna he thihna lo hretu zawng zawngte hnenah pawh ngaihdam kan dil a ni," an ti.

Zakaria Lalhriattluanga tualthihna chungchangah hian Kawnpui VC-I leh Kawnpui Hmarvenga pawl hrang hrang hruaitute chu nimin zing khan an ṭhukhawm. Pawi khawihtute chu police-te'n an chhui chhuah vat an beisei thu sawiin, "Khawtlang mipuite'n theihtawp chhuaha pawi khawihtu an chhuina kawngah ṭanpui ni se kan ti," an ti a; Zakaria kut thlaktu dik tak hriat chhuah a nih hunah dan hmanga an phû tâwka hrem ngei an duh thu an tarlang bawk.