Champhaia SARAS Fair 2019-ah Cheng nuai 21 chuang man hralh

Mizoram State Rural Livelihood Mission (MzSRLM) leh District Rural Development Agency (DRDA), Champhai ten October 28, 2019 aṭanga Vanish Hall, Champhaia Regional Saras Fair 2019 an buatsaih chu nimin khan khâr a ni a, khârna inkhawmah Champhai SP Rex Zarzoliana Van­chhawng chu khuallian a ni. Fair chhungin cheng nuai 21 chuang man an hralh chhuak.

SARAS Fair khârna inkhawmah hian khuallianin thu a sawi bakah, Champhai DRDA project director Ethel Rothangpuii'n thu a sawi. Fair-a dawr ṭha ber atan Vaphai VO, Khawbung RD Block thlan a ni a, RD block ṭha ber atan Chawngte RD block thlan niin, Saras Queen atan Lalrampari, Serchhip RD block thlan a ni.

Regional Saras Fair-ah hian Mizorama RD block 14 aṭangin self help group (SHG) member 100 kalkhawmin, thingtlang mite thar chhuah leh siam chhuahte zawrhna stall 50 hawn a ni a; skill development lama inzirtirna Deendayal Upadhyaa Grameen Kaishalya Yogana (DDUGKY) stall siam hmanga neih ṭhin a ni. Nimina an hralh bik tel loin, November 7, 2019 thleng khan mi 7,759-in tlawhin, Rs. 21,54,331 man an hralh.

SARAS Fair hi MzSRLM hmalaknain an enkawl self help group-te tan ṭum li buatsaih a ni tawh a, tun ṭuma mi hi a vawi ngana a ni. A vawi rukna chu December 2019 hian Aizawlah neih leh a ni ang.