Lungleiah Cultural Meet neih a ni

Nimin khan Lungleia Zohnuai Mualah Art & Culture department leh Mizo Cultural Organisation sub-headquarters, Lunglei ten Cultural Meet an huaihawt a, Lunglei DC K Lalrinzuali'n a hmanpui.

Cultural Meet-ah hian hnam lâm chi hrang hrang - cheraw, sarlamkai, chheih lam, parlam leh chawnglaizawnte entir a ni a; Mizo rimawi - tumphit, phénglawng leh hnah tumte leh ṭingṭang nawhte ngaihthlak a ni. Mizo infiamna chi hrang hrang entir a ni a, zai­thiam tak takte an zai bawk.

Meet hawnna in­khawm­ah Lunglei DC chuan, Mizo hnam nunphung leh khawsak dan te, hnam incheina leh tih dan ṭhate a ral mai loh nan leh thangtharte'n an hriat ve zel theih nan Cultural Meet buatsaih a nih thu a sawi a, "Kan pi leh pute ro hlu - Zo nun mawi, awm dan ṭha, tlawmngaihna, aia upa zah, mi retheite khawngaihnate vawng nunga kan hriat thar leh a ngai. Mizo hnam incheia inchei a pawimawh em em rualin, kan rilru leh kan chêtziaah nun mawi lan chhuahtir hi Mizo hnam humhimna pawimawh tak a ni," a ti.