Mau hman ṭangkai dan zirna buatsaih

Sorkar laipuia Ministry of Environment, Forest and Climate Change bultumin nimin khan ICFRE–Bamboo and Rattan Centre, Aizawlah 'Bamboo & Rattans: From Conservation to Sustainable Utilisation' tih hmangin zirhona buatsaih a ni a, Aizawl mayor H Lalremtluanga'n a hmanpui.

Training hi mau leh hruihnâng hman ṭangkai dan te, humhalh leh a hlutna tipung thiam tura kawng inkawhhmuhna tur niin, ni thum chhung buatsaih a ni dawn a; thiamhnâng deha eizawng te, tlawmngai pawl aiawh te, zirlai te, zirbingmi (research scholar)-te leh mau chingtute an tel. Training-a telte chu Mizoram Bamboo Centre, Lengpui leh Bamboo Technology Park, Sairang te tlawhpui an ni ang.

Aizawl Mayor chuan, ICFRE-BRC chu mau leh hruihnâng hmanga eizawngte chawi kânnaah an thawh hlawk hle tih sawiin, "Mau leh hruihnâng te hi Mizo hnam nunphungah a bet tlat a, tunlai thiamna hmang ṭangkai chung zela tlo zawk leh ṭha zawka thil siam chhuak tura hmalak zel a pawimawh," a ti.

ICFRE–Bamboo and Rattan Centre-a scientist-D Sandeep Yadav pawhin thu sawiin, mau leh hruihnâng hmanga eizawnna kawng ṭha zawk siam dan leh hman ṭangkai dan ngêlnghet zawk mipuiin an neih theihna tura ICFRE-BRC hmalak dante a sawi a ni.