MPCB din champhaah hmun tifai

Mizoram Pollution Control Board (MPCB) chuan nimin khan MPCB din champha vawi 37-na pualin Mission LiFE Campaign an huaihawt a, MPCB pisa chhehvel leh MINECO hmun ṭhenkhat an tifai.

September 22, 1989 khan Air Act leh Water Act tlawhchhanin Mizoram sorkarin MPCB a din a, Mizoram leilung, thing leh mau leh nungchate humhalh leh vênhim kawngah hma an la ṭhin a ni.

MPCB chuan, Mission LiFE-in a tum ber chu, mipuite’n environment tâna nunphung him leh ṭha an neih zel theihna tura hmalak a nih thu an tarlang a; environment tichhetu ni lo a, humhimtu leh vênghimtu ni a, nunphung ṭha leh tlo zâwk nei turin mi tin an sáwm a ni.