Chhiatna laka inven dan zirlaite zirtir

Kolasib District Disaster Management Authority leh CZ Higher Secondary School chuan nimin khan Kolasib Diakkawn YMA Hall-ah chhiatna thleng thei laka inven leh inbuatsaih dan tur inzirtirna, 'Implementation of School Safety Programme' an buatsaih a, district bawrhsap H Dolianbuaia'n a hmanpui.

Bawrhsap chuan, India ramah Disaster Management Plan mumal tak a awm thu sawiin, "Disaster hian huam a ngah a, khuarel chhiatna leh mihringte siam chawp chhiatna a awm. Sorkarin chhiatrupna laka inven leh lo inbuatsaih lâwk a ngai pawimawh em em a, chuvang chuan training leh programme a buatsaih ṭhin. Chhiatrupna laka him turin mipui leh zirlaite'n training an mamawh, " a ti.

Kolasib DC hian chhiatrupna a thlen thulha hmalak dan tur an zirte chu a hunah hman ṭangkai tum ṭheuh turin zirlaite a chah a ni.