KHAWTHLIR

Minister-in lawmpui

Sports & Youth Services minister Lalnghinglova Hmar chuan September 21, Thawhṭanni khan a pisaah khawvel huapa badminton-a inelnaa medal latu H Lalṭhazuala, Chanmari West hnenah lawmpuina a hlan. H Lalṭhazuala hian September 6, 2026-a Cameroon International Cup 2026-a gold medal a la a, August 29, 2026-a Lagos International Badminton Classics, Nigeria-ah silver medal a la bawk.

Sailulak Day

Sailulak khawtlang chuan nimin khan Sailulak Day vawi 128 an hmang a, minister PC Vanlalruata leh bialtu MLA Lalmuanpuia Punte ten an hmanpui.

Heroin man

Excise & Narcotics department leh Assam Rifles sipaite chuan nimin chawhnu dar 2 vel khan Zote leh Bulfek inkar kawngah Pauchinthanga (46), New Champhai Helipad Veng nia insawi hnen aṭangin heroin gram 492.160 (hawng 35) an man. The Narcotic Drugs & Psychotropic Substances Act, 1985 Section 21(c) tlawhchhanin thubuai ziah luh a ni.

MIWAS enchhin

Finance department bultumin nimin khan PWD-a engineer leh officer te pualin Mizoram Integrated Works and Accounts Management System (MIWAS) application hman chhinna leh a ṭhat dan enchhin a ni. MIWAS-ah hian department hrang hrang hnathawhte awlsam takin enkawl theih a ni dawn a, department azirin parameter hrang hrang te, sum mamawh zat, approval leh thil dangte online-in a tih theih dawn a ni.

Disaster training

Champhai District Disaster Management Authority chuan nimin khan Champhai IPR Auditorium-ah chhiatna leh chetsualna a thlen thulha chet lâk dan tur leh mipui himna tura hmalak dan turte inzirtirna, 'Comprehensive Training on Disaster Management' a buatsaih a; Champhai ED Block Village Disaster Management Committee member-te an tel a, thil pawimawhte inzirtir a ni.