NHRC hotuin Mizoram a fang kual

National Human Rights Commission (NHRC) special rapporteur Sayeed Ahmed Baba hoin nimin khan Saitual DC conference hall-ah sorkar hotute leh tlawmngai pawl aiawhte an ṭhukhawm. Sayeed Ahmed Baba chuan, department hotute chu mihring dikna leh chanvo rahbeh a nih loh nan theihtawp chhuah turin a chah.

Sayeed Ahmed Baba chuan, NHRC chu mihringin dikna chanvo a neihte dik taka hman a nih theih nan din a nih thu a sawi a, "Mi tinin kan dikna chanvo kan hriat a pawimawh a, mihring dikna chanvo zahsak kawngah department hotute an pawimawh. Hei hian khawtlang nun a tihlan avangin kalkhawmte hian min dawrtute buaipuinaah ṭan kan lak a ṭul," a ti a; mi dikna chanvote rahbeh a nih loh nan theihtawp chhuah turin a fuih.

NHRC Special Rapporteur hian Saituala One Stop Centre, Police Station leh District Hospital te a tlawh a; nimin vek khan Champhai a pan. September 21, Thawhṭanni khan Kolasib district a tlawh tawh bawk.