SIR 2026 appeal hearing hun sawn

Electoral roll Special Intensive Revision (SIR) 2026 final electoral roll tihchhuah tâka Aizawl district-a electoral registration officer (ERO)-te thutluknaa lungawi lo, District Magistrate hnena appeal thehlutte tana appeal hearing neih hun chu October 5-22, 2026 chhunga neih turin sawn a ni.

Ruahmanna hmasaah chuan appeal hearing hi vawiin aṭanga September 30, 2026 thleng neih tura tih a ni a; Aizawl District Election Officer nimin khan chuan hriattirna chhuahin, appeal hearing neih hun tura ruat chu October 5-22, 2026 chhunga neih turin sawn a nih thu a tarlang.

September 7, 2026 khan SIR 2026 final electoral roll tlangzarh a ni a, voter 8,35,869 awmin, mipa 4,03,179, hmeichhia 4,32,689 leh transgender (nihna thlak) pakhat an ni. SIR 2026 neih a nih hmain Mizoram electoral roll-ah voter 8,75,068 an awm a, SIR roll tharah voter 39,199 (4.48%)-in an tlem zawk.

SIR 2026 electoral roll tlangzarh tawh ni mah se, Electors Rules, 1960 Rule 27 leh Representation of the People Act, 1950 Section 24(a) hnuaiah ERO thutluknaa lungawi lote tan district magistrate hnenah zualko theih a ni. Aizawl district-a MLA bial 11 aṭangin District Magistrate hnenah appeal 632 a lut a; chungte chu October 5-22, 2026 chhunga ngaihtuah tura tih a ni.