BSF lâk tawhte bàn vangin MSU lawm

Mizo Students’ Union (MSU) chuan, Staff Selection Commission (SSC) kaltlanga BSF constable (GD) atana lak, Mizoram certificate lem hmanga hnam dang tlingte bàn an ni ta chu lawmawm an tih thu an tarlang.

MSU chuan, BSF constable lak zingah hnam dang, Mizorama cheng anga certificate lem hmang an awm avangin Aizawl Police Station-ah March 6, 2026 khan first information report (FIR) an thehlut thu an sawi a, "MSU chhui zuina leh enzuina azarah an hna aṭanga bàn an ni ta hi lawmawm kan ti tak zet," an ti.

Dik lo taka Mizoram certificate lem hmanga BSF-a lutte bàn an nih theihna tura Mizoram Police-in theihtawp an chhuahnaah an lawm thu sawiin MSU chuan, "Tun hnuah hetiang hi thleng nawn tawh lo se kan ti tak zet," an ti a; certifate lem siamsak ṭhinte chu hnam tana thil ṭha lo tak ti an ni tih inhria a, chíng tawh lo turin an chah.