Pluck and Pay Festival buatsaih mek; Thei/thlaite mahnia loin lei theih a ni
Tourism department leh Khawzawl DC pisa ṭang dun chuan nimin khan Chawngtlai leh Tualte-ah 'Pluck and Pay Festival' (lo la, lei rawh) an buatsaih ṭan a; Tualte khuaa Vanhnuailiana Hall-ah Tourism minister Lalnghinglova Hmar-in a hawng.
Pluck and Pay Festival hi September 23-25, 2026 chhungin Chawngtlai leh Tualte khuaah neih a ni dawn a, Festival chhimtute'n a thlengtu khuaa loneitute huana theite leh thlaite chu anmahnia loin an lei dawn a ni. Chawngtlai kâwnah kut hnathawktute thar leh siam zawrhna dawr eng emaw zat siam a ni a, Zawlkhaw Adventure Club-in zipline hmanga uai theihna an buatsaih.
Chawngtlai Historical Society leh Tualte Vanglai Committee te kaihhruaiin Mizo hmun hlui hrang hrang - Pathian Tlang, Nikuala Lungdawh, Zo Hill Station, pasalṭhate in hmun leh hmun pawimawh dangte tlawh theih a ni a; Mizo infiamna hrang hrang buatsaih a nih bakah, concert buatsaih a ni dawn bawk.
Tourism Minister chuan, Mizoram mawina, boruak thianghlim, thing leh mau te chu khualzin hîptu a nih thu a sawi a, "Festival-ah hian Mizoram páwn aṭangin khualzin lo kal se kan tih rualin, Mizorama chengte hian kan rama hmun mawi leh pawimawhte kan ngaihsana kan ngaihhlut hmasak a, kan intlawhpawh a ngai a, kan ram mawina thehdarhtu ambassador kan ni ṭheuh thei a ni," a ti.
Chawngtlai leh Tualte mipui inpekna leh thawhrimna fakin Lalnghinglova Hmar chuan, "Kan ram mawina leh hausakna pho chhuak tura Pluck and Pay Festival buatsaih a ni hi a lawmawm a, hman khat daih plastic tel loa Festival hman tum a ni hi a fakawm," a ti a; festival dang la awm turah pawh plastic tel lo green festival hmang turin hmalak a nih thu a sawi.
Pluck and Pay Festival Organising Committee chairman K Vanlalṭhiana, Khawzawl district bawrhsap chuan, "Tualte leh Chawngtlai khuaa Pluck and Pay Festival kan nei thei hi Khawzawl district tan hmasawnna ropui tak a ni," a ti a; Festival chhungin kut hnathawktute thawhrimna hriatpui a, an thlai leh thei tharte lei a, hlim taka hun hmang turin Mizoram mipui a sáwm a ni.