Argiculture leh MULCO ten MoU an ziak

Agriculture & Farmers Welfare department leh Mizoram Milk Producers' Cooperative Union Limited (MULCO Ltd.) chuan nasa zawka natural farming kalpuina turin nimin khan Agriculture conference hall-ah thawh dunna thuthlung, memorandum of understanding (MoU) an ziak.

Thuthlungah hian Agriculture director Vanramthangi leh MULCO managing director Ramesh Kumar ten hming an ziak a; Agriculture minister PC Vanlalruata'n a hmanpui a, Agriculture department leh MULCO hotute bakah, ran vulhtu aiawhte an tel.

MoU hi National Mission on Natural Farming Guidelines anga kalpui tur a ni a; Agriculture department hnuaia bio resource centre (BRC)-te'n bawng êk leh zun hmanga siam leiṭha (organic fertilizer) leh rannung thahna (bio-pesticide) siam chhuakin, loneitute hnenah an hralh ṭhin dawn. Thil siamte chu natural farming hnuaia loneitu inziak lutte hmang tura beisei an ni.

BRC-te'n leiṭha leh rannung thahna te an siam chhuah reng theih nan leh MULCO hnuaia bawng vulhtute'n sum an lak luh belh theih nan MULCO huang chhunga bawng vulhtute'n bawng ek leh zun te chu BRC-te hnenah an hralh ṭhin ang.

Agriculture depart-ment hian kum 2025 aṭang khan National Mission on Natural Farming Scheme an kalpui a, district tinah cluster 304 an din tawh. Cluster-te enkawl tur hian community resource person (CRP) 608 ruat an ni tawh a, bio resource centre 72 din a ni tawh bawk.

Minister PC Vanlalruata chuan, MoU avangin Mizorama kut hnathawktu, a bikin ranvulha eizawngte tana hmasawnna rahbi thar Mizoramin a kai thu a sawi a, "He thawh dunna hi Mizoram tan thil chhinchhiah tlak tak, a bik takin bawng vulhtute tana hmasawnna ropui tak thlentu a nih ka beisei," a ti.

Mizoram sorkarin kut hnathawktute dinhmun chawi kân nan theihtawp a chhuah zel dawn thu sawiin Minister chuan, "Thawh dunna hnuaiah hian ran zun leh êk aṭanga leiṭha leh rannung thahna hlote siam a nih a, chu'ngchu loneitute'n an hman ṭangkai hunah chuan mipui vantlang hriselna pawhin hma a sawn ngei dawn," a ti a; thawh dunna a hlawhtlin theih nan ṭanrual a pawimawh dawn thu a sawi bawk.