Political fitness beisei tan hmun a awm dawn lo - Home Minister
Home minister K Sapdanga chuan nimin khan Darkhawpui Rûn, Darlawnah MZP Assembly a hmanpui a; hnam vei danah huang zauh a hun tawh thu leh sorkarin thawktu a lak turah political fitness lam beisei tan hmun a awm dawn loh thu a sawi.
K Sapdanga chuan, tualchhung hna pawh el fê tham a nih thu sawiin, "Home department-in home guard 94 a la dawn a, HSLC pass chin chung lam mi 6,200 vel diltu an awm a, an zinga 6,100 vel an tling dawn lo. Graduate hlir pawh la dawn ila, an daih zãn. Nikuma police constable 295 lak zinga 50 zet chu graduate an ni a, master degree nei 20 vel an awm. Chutihlaiin, pawl 10 pass ṭâwk ṭâwk, tih tak taka beitu tling an tam em em a ni," a ti.
Police constable 350 lakna tur puanzar mek a nih thu sawiin Minister chuan, "Diltu mi 20,000 - 30,000 vel an awm beisei a ni. Education department-in zirtirtu ṭhahnem tak lak tumin a inbuatsaih mek. Merit dik takin, a thiam thiam fair takin lak tum leh a ni a, political fitness lam beisei tan hmun a awm dawn lo. Chu chu MZP hian a duh zawng a nih ngei kan beisei," a ti a, tualchhunga eizawnna atana inelna chu rim taka thawkte tan a nih thu a sawi.
Ṭhalaite'n Mizoram nuam an ti mah mah tih sawiin K Sapdanga chuan, "Kan khawtlang nun, social life a nuam a, thawh chhuah nei lêm lo pawh hian kan lungawi em em a, kan comfort zone aṭanga tâl chhuah kan hreh a, state dang hmasawn zawkte awh nachang kan hre lo. Tun aṭanga hun rei vak loah chuan sorkar department tam zawka hotu lu ber chu state páwn lam mi an ni dawn," a ti a, Chief Secretary tur Mizo an awm hnai lo tih a tarlang.
K Sapdanga chuan, Delhi-a a kal chángin Delhi-a Mizo zirlai hruaitute nen an inkawm ṭhin thu leh, tun hnaiah Delhi-a Mizo officer-te nen an inkawm ṭhin thu a sawi a, "Central Secretariat-ah te, corporation office hrang hrangah te Mizo hnahthlak an tlem a, a awm chhunte pawh Mizoram state páwn lama cheng kan unaute an ni deuh vek. Damdawi-in lianpui pui a tam hle a, Mizo tlangval doctor hmuh tur an awm meuh lo a, Mizo nula nurse tawn fuh tur an awm zeuh zeuh," a ti.
Mizoram state a pachhia a, hmasawnna tura mamawh sum 90% aia tam mah sorkar laipui aṭanga hmuh a nih thu sawiin Sapdanga chuan, "Tax devolution avanga kan hmuhte a beitham hle, a chhan chu kan state-in central-a tax kan zu chhun luh hi a beitham êm a ni," a ti a, Mizoram mamawh tam zawk chu Central aṭanga dil chhuah a nih thu a sawi.
Home Minister chuan, state dangte pawh Central suma innghat ni tho mah se, Central Secretariat-ah an mi leh sa eng emaw zatin hmun pawimawh tak tak an luah thu a sawi a, "Hmelhriat nei leh nei lo kar a hla fo. Officer tlemte kan neihte awmna office chu a dan a dang khawp mai, mahse, kan tlem lulai em a ni. UPSC hnuaiah Civil Service kan zuam lo a nih pawhin, Staff Selection Commission hnuaiah central ministry hnuaia thawh tur hna ṭha tam tak exam tur a awm reng a ni," a ti.
K Sapdanga chuan, India ram state dangah pawh zirlai pawl an awm thu sawiin, "University lianahte hian zirlai pawl lian leh active tak tak an awm. A tlangpuiin political party sponsor an ni hlawm a, chu chu MZP nen a inan lohna a ni. A hmingin zirlai pawl an ni a, mahse, MZP nen chuan ṭobul leh tinzâwn a hrang daih. Ṭha nia kan hriatah chuan sorkarah huaisen takin thurâwn kan pe ṭhin tur a ni," a ti.
Home Minister chuan, MZP chu hruaitu ni tura inzirna remchang a nih thu sawiin, "Non political social organisation zinga hnam humhalh tina ber pawl a ni hial ang. Hruaitu hluite hi political party-te hian an pawl zawm tura thlèm takah an nei ve bawk ṭhin a, a mawi lo zawnga sawi duh an awm pawhin thil mak a ni lo," a ti a; ṭhenkhat chu thlêmna a nasat êm vanga politics-a zuang lut an nih thu a sawi.