KHAWTHLIR

Zangnadawmna pe

Mamit District Legal Service Authority chuan nimin khan Mamit District Court hall-ah Mizoram Victims of Crime Compensation Scheme 2011 inhrilhfiahna leh semna hun an buatsaih a; Mamit chief judicial magistrate H Lalduhsanga'n kaihruaiin, Mamit district-a mi 32 hnenah pawikhawihna tuartute tana zangnadawmna Rs 97,50,000 pek a ni.

Ṭanpuina pawm

Serchhip DC Paul L Khuma hoin nimin khan District Sponsorship and Foster Care Approval Committee an ṭhu a; kum 2026-27 chhung atana naupang harsa zual chhawmdawl ngai mi 150 hnenah Child Protection Services (Mission Vatsalya), Women & Child Development hnuaia chhawmdawlna (sponsorship) pek turin an pawm. Sponsor hi thla khatah naupang pakhat tan Rs 4,000 ruahman a ni.

Apollo Diagnostic Laboratory hawng

Nimin tlai khan Apollo Diagnostic Laboratory, Aizawl Temple bula mi chu Assembly deputy speaker Lalfamkima'n a hawng. Apollo Diagnostic-ah hian natna chi hrang hrang enfiahna khawl eng emaw zat bun a ni a, doctor-te'n an ṭhut chilh dawn a ni.

Chawimawina hlan

Lunglei District Institute of Education & Training chuan nimin khan an Multipurpose Hall-ah Diploma in Elementary Education (D.El.Ed) leh Bachelor of Education (B.Ed) exam-a ti ṭhate hnenah ZD Rongura Award an hlan. Award hi D.El.Ed-a Mizorama pakhatna Lallawmsangi leh Lalruatmawii (B.Ed) te hnenah hlan a ni a, Mizorama pasarihna Laldinliana Sailo hnenah DIET Meritorious Award hlan a ni bawk.

Life jacket hlan

Lawngtlai bawrhsap Donny Lalruatsanga chuan nimin khan Lawngtlai Police hman turin SDPO C Ramnunmawii hnenah life jacket a hlan. Bawrhsap chuan life jacket chu Lawngtlai SP Dheeraj Dwarka Gaadhi-a'n a dil anga pek a nih thu sawiin, tuitla chhanchhuah leh ṭul dangah ṭangkai taka hmang turin duhsakna a hlan. Life jacket pakhat hian kg 120 a zo a ni.

Myanmar-a phurh luh khap

Lawngtlai district magistrate Donny Lalruatsanga chuan hriattirna chhuahin, dan loa Myanmar lama sumdawnna bungrua leh lirthei phurh luh khap a nih thu puang. District Magistrate chuan, lirthei rûk bo leitute chu sumdawnna atan hmang lo tur te, lirthei lei/hralh dawnin ownership document leh document ṭul dang enfiah hmasa tur te, Indian document-te hnam dang (foreigner) hman/hawhtir phal a nih loh thu leh, India ram páwnah India siam lirthei hralh phal a nih loh thute a tarlang.