Mihring dikna chanvo humhalh sawiho

National Human Rights Commission (NHRC) special rapporteur Sayeed Ahmed Baba hoin nimin khan Champhaia sorkar hotute leh tlawmngai pawl hruaitute DC conference hall-ah an ṭhukhawm.

Sayeed Ahmed Baba chuan, mihring dikna chanvo humhim turin kawng engkimah rilru zau put a pawimawh thu a sawi a, "Mihring dikna chanvo hi hmun eng emaw thlan bik atan chauh ni loin, hmun tinah dah pawimawh vek a ngai. Tunlai khawtlang nunah rirlu lama harsatna a pung nasa a, heng harsatnate tibo tur hian rilru hriselna ngaih pawimawh a ṭul," a ti.

Mizorama rilru lama harsatna neite ṭanpuina Tele-MANAS helpline chu changtlung zawka kalpui a ṭul thu sawiin NHRC hotu chuan, "District Hospital-ah psychiatrist, psychologist leh counsellor-te dah a, OPD leh ward-a awm mekte hnenah counselling chak taka pek a pawimawh," a ti a; rilrua harsatna neite enkawlna tur ward hran siam a ngaih pawimawh thu a sawi bawk.

NHRC Special Rapporteur hian meeting a neih zawh hnuah One Stop Centre, Shakti Sadan, Mazuia Memorial Home (TNT), District Jail leh Meta Khen te tlawhin thawktute a kawm a, an hnathawhte enpuiin hmasawnna an neih thei dan turte a sawipui bakah, enkawlna dawngtute a kawm a ni.