Hlemhletna chungchang mipui zirtir

Anti-Corruption Bureau (ACB), Mizoram chuan nimin khan Chawngtea Kamalanagar College leh Chakma Autonomous District Council (CADC) Secretariat-ah eirukna leh hlemhletna chungchang inhrilhfiahna, Anti-Cor-ruption Awarness Programme an buatsaih.

Kamalanagar College-a awareness-ah hian zirlai 150 chuang an tel a, CASC Secretariat-ah mi 400 chuang telin, CADC chief executive member Nirupam Chakma khuallian a ni a; ACB additional SP Zarzoliana'n eirukna do leh ven chungchang a sawifiah.

Zarzoliana chuan, sorkar hnathawk, mipui aiawhte leh mipui vantlangte'n eirukna donaah mawhphurhna an neih thu a sawi a, "Eirukna do hi sorkar hnathawkte chauh mawhphurhna a ni lo a, mipui, zirlai, department hrang hrang leh mipui aiawhte thawhhona aṭanga hmalak ngai a ni," a ti.

Eirukna emaw, dan kalh thil tih emaw an hmua an hria a nih chuan, danin a phal angin thuneitu hnenah huaisen taka hrilh ṭhin turin ACB chuan mipui an chah a ni.