CM leh ZPM President nihna bànsan turin MPYCC-in Lalduhoma an phût

Mizoram Pradesh Youth Congress Committee (MPYCC) chuan thuchhuah siamin, chief minister Lalduhoma chu puh a nihna hrang hrangah insawifiah buai loa chief minister leh ZPM president a nihna bànsan turin an phût.

MPYCC chuan, ZPM Val Upa Council (VUC) a din tirh aṭanga a bultumtu Bualhranga leh Rin Sanga ten VUC aṭanga bànna an thehluh thu tarlangin, "An bàn chhan chu VUC-in a awm chhan ang takin awmzia a nei tawh loa an hriat vang te, Chief Minister sûkthlêk chu ram tana pawi tur tih te, Ministry chu sawimawi leh sawi mâm ringawt thiamin a ho khawm vang te, CM hmeichhiat mipatna leh eiruk (corruption)-ah sawi kai nia tarlan a ni hi zahthlak kan ti tak zet," an ti.

Congress ṭhalaite chuan, "Mizoram, Kristian ram hruaitu hetianga mipat hmeichiatna leh eirûk lama a fihlim lo hi ram hruaitu ni tlak lo, ram leh hnam mualphona a ni," an ti a; insawifiah buai loa CM a nihna leh ZPM president a nihna bànsan nghal turin CM Lalduhoma an phût tih an tarlang.

MPYCC chuan, Bualhranga leh Rin Sanga ten VUC aṭanga bànna an thehluh chhan ngaihtuahin, "ZPM president thar puan nía Pu Lalduhoma'n an party hruaitu tharte chu VUC kaltlanga Pathianin a pek a ni tih pawm turin an party mite a ngen thu a sawi kha VUC kaltlang a nih lohzia a tichiangah kan ngai," an ti bawk.