Venghlui Paho Zing Duty chawimawi

Aizawl bawrhsap Lalhriatpuia chuan nimin khan DC conference room-ah kum sarih chhung Treasury Square leh a chhehvela ruihhlo leh sualna venga awm ṭhin Venghlui Paho Zing Duty mi 15 hnenah chawimawina thuchei a hlan a, a ṭula an hman atan Rs 15,000 a pe bawk.

Lalhriatpuia chuan, "Kan lawmthu sawina hi beitham mah se, khawtlang tana in inpeknaa kan lawmzia, a hlutzia leh kan ngaihsanzia che u lantirna a nih avangin min pawmsak ka beisei," tiin, ruihhlo donaa kum sarih chhung hma an lak tawhna chu ropui a tih thu a sawi a, an kal zelna turah duhsakna a hlan.

Venghlui Paho Zing Duty aiawhte chuan July 27, 2019 aṭang khan duty an ṭan thu an sawi a; Bawrhsap hnenah hian Treasury Square leh a chhehvel a him zawk theihna tura thuràwn an neihte an thlen bawk.