HM-in huaisen lawmman dawngtute chawimawina hlan

Home minister K Sapdanga chuan nimin khan a pisaah sorkar laipuiin huaisen chawimawina a buatsaih - Uttam Jeevan Raksha Padak dawngtu mi pahnih - Joseph Lalnunmawia, Darlawn leh Laldinkimi, Kawlkulh te chu chawimawina a hlan.

Home Minister chuan huaisen chawimawina dawng Mizo zinga an awm thei zel chu lawmawm a tih thu sawiin, "Mahni chunga thihna thleng thei pawh pawi sa loa midang nunna chhanhim chu thil ropui tak a ni. Hmanlai kan pi leh pute thufing 'Ṭhian chhan thih ngam' la chhawm nun zel a ni hi a lawmawm," a ti.

Chawimawina hi thil ṭha tih nen kal kawp tir a pawimawh tih sawiin K Sapdanga chuan, "Chawimawi phûte kan chawimawi hian hnam anga kan mawina a ni zel a ni," a ti a, Mizote chu inchawimawi tawnna kawngah ke pen zel turin a chah.

Inkhawmah hian Aizawl DC leh Khawzawl DC office aṭangin chawimawina dawng tute chanchin tawi leh an dawn chhan ngaihthlak a ni.

Joseph Lalnunmawia hian mi paruk kangmei aṭanga chhan chhuakin, Uttam Jeevan Raksha Padak chawimawina hlan a ni a; Laldinkimi hian tuitla chhanchhuakin, Jeevan Raksha Padak chawimawina hlan a ni.