Pathianni-a bank hawn tum pawi ti

Central YMA chuan thuchhuah siamin, September 28-30, 2026 chhunga ram pum huapa bank hnathawktuten nawrh huaihawt an tum avanga Public Sector Bank leh Regional Rural Bank-te Pathianni, September 27, 2026-a inhawng tura thutlukna siam a ni chu pawi an tih thu an tarlang.

CYMA chuan mipuite tan tluang taka bank hna hi kalpui ṭha an tih thu tarlangin, "Hetih rual hian, kan sakhua leh nunphung hi min zah sak se kan duh. Mizoram cheng tam berte hi Kristian sakhua zuitute kan ni. Pathianni hi Pathian biakna, ṭawngṭaina leh sakhaw serh leh sang hman hun a nih avangin tunhma aṭangin dawr leh sumdawnna hmun hrang hrangte pawh khar ṭhin a ni. Ministry of Finance, Reserve Bank of India (RBI), bank thuneitute leh Mizoram sorkar hnenah he thutlukna hi Mizoram bik tan kaltlangpui chi a ni em tih ennawn leh turin kan ngen a ni," an ti.

Bank hawn hun chhung pawh sei, ATM tihchak leh digital banking tihhmasawn emaw, mamawh bik tana emergency service siam theih ni se an duh hle tih tarlangin CYMA chuan, "Awlsam taka mipuiten bank an dawr theih hi ṭha kan tih rualin, bank hnathawktute sakhaw vawn leh an dikna te, Mizoram mipuiten sakhua kan ngaih pawimawhna hi zah sak ni se kan duh. Mizoram sakhua leh khawtlang nunphung nghawng thei thutlukna reng rengah state sorkar leh a kaihhnawih pawl hrang hrangte nena sawihona mumal tak neih hmasak hnuah chauh kalpui ṭhin ni se kan duh," an ti a, thutlukna awm tawh chu ngaihtuah ṭhat ni se an duh tih an tarlang.