CEC ban phûtin MPCC-in kawng an zawh

Mizoram Pradesh Congress Committee (MPCC) chuan nimin khan chief election commissioner (CEC) Gyanesh Kumar bang tura phûtin Congress Bhavan a nihna neiten Vanapa Hall aṭanga State Election Commission (SEC) pisa thleng kawng an zawh.

CEC pisa bula thusawitu MPCC president Lal Thanzara chuan, kum thum kalta aṭang khan Election Commission of India (ECI) chu Rahul Gandhi-a'n a sawisel tawh tih sawiin, "Sorkar laiin engahmah an ngai lo a, tunah erawh ECI-te thiltih dan dik lo chu chanchinbu miten khawvel hriatah an puang ta a ni. Gyanesh Kumar hian BJP-te tana thawkin, thla 10 chhungin ECI pahnih Sukhbir Sandhu leh Vivek Joshi tena rawtna ṭum 14 lai an siam tawh chu engahmah ngaihsak duh loin, a duh dan danin thil a kalpui," a ti.

MPCC President chuan electoral roll aṭangin voters vaibelchhe têl paih an nih mek thu sawiin, "BJP-ten state hrang hranga inthlanah chakna an chan ṭhinte pawh vote tihchingpen (vote chor) vang nia hriat a ni. Hetianga thil dik lo tak hailana a awm hi India rama Congress-te chuan kan ngai thutak takzet a, vawiinah pawh hian kan auchhuahpui ta a ni," a ti a, nakin lawka state inthlang turahte pawh tuna voter list an puan chhuah ang ringa inthlanna neih a nih chuan BJP-te hian dik lo takin chakna an chang leh thei dawna an hriat thu a sawi.

August 8, 2026 khan AICC president leh opposition leader RS Malliarjun Kharge chuan Uttarakhand-ah vantlang inkhawm neiin thu a sawi tih sawiin Lal Thanzara chuan, "A thusawi zawh hnu lawkah BJP peng pakhat Shri Ram Sena-te chuan Kharge ṭhutna chu hnam hnuaihnung khawih thiang lo a ni an tih avangin an hrufai a, an thian thianghlim. He thil hi Rahul Gandhi chuan nasa takin chi inthliarna a nih thu a sawi. Rahul Gandhi thusawi chu duh loin Ram Sena member Amit Kumar chuan FIR a thehlut," a ti.

MPCC President chuan BJP worker leh Ram Sena-te laka FIR thehlut loa Rahul Gandhi zawk FIR an thehluh khum chu an dem hle tih sawiin, "Rahul Gandhi laka FIR thehluh mai a ni lo, sakhaw tih bik neia hnam inpumkhatna tichhe zawnga hmala a, hnam hnufualte hmuhsitna lantirtu BJP hi kan dem takzet a ni," a ti a, RSS-te chu an hmalakna hi titawp tura an hriattir thu a sawi.