Khualzin rawn lut zel se kan duh rualin a ken tel thil ṭha lo laka inven a ṭul - Tourism Minister

September 24, Nilaini tlai khan Tourism minister Lalnghinglova Hmar hoin a pisaah Tourism department leh Aizawl Municipal Corporation (AMC) hotute'n homestay enzui leh Aizawl khawpui chei chungchanga thawhho dan tur an rel a; Tourism Minister chuan, khualzin rawn lut zel se an duh rualin, a kentel thil ṭha lo laka inveng turin hmalak tel a ṭul thu a sawi.

Lalnghinglova Hmar chuan, tourism hmasawnna tura Mizoram sorkar hmalakna in rah a chhuah mek zel tih sawiin, "A kum telin khualzin an pung. Khualzin rawn lut zel se kan duh rualin a ken tel thil ṭha lo laka inveng turin hma kan lak tel reng a ṭul. Hunpui lo thleng turah kum hmasa aia tam khualzin kan beisei," a ti.

Khualzin tam ber chuan Aizawl an tlawh dawn avangin AMC nen thawhhona ṭha tak an neih a ngaihthu sawiin Tourism Minister chuan, "Khualzinte thlenna, a bikin homestay ṭhenkhat chu ruihhlo leh mipat hmeichhiat kawngah dik lo taka hman a ni," a ti a, chumi behchhana Mizoram rawn zin an awm ṭhin nia an hriat thu a sawi.

Tourism Minister chuan homestay hi chhungkaw tam tak tan eizawnna a nih avangin a ṭawp ang tih an hlauh thu sawiin, "Tourism leh ṭawp hi a inkawp kan duh lo. A ven kawngah AMC area-a local council-te thawhpui kan duh. Aizawl khawpui cheimawi hi khualzin hiptu pakhat a nih avangin, hunpui vuakvetah a hmalama mawi taka chei kan duh," a ti.

Ṭhutkhawmah hian AMC huam chhunga khualzin thlenna (accommodation unit) ah Tourism department leh AMC-a in register lo an tam thu leh registration nei loa hetiang kalpuite chu 'The Mizoram (Registration of Tourist Trade) Act, 2020' hnuaiah Rs 50,000 thleng chawitir theih an nih thu tarlan a ni.

AMC area-a local council-te nen thawkhoin, an veng chhung ṭheuhah registration nei loa hotel, homestay etc. kalpuite zawn chhuah runpui neih an rel a; chumi tur chuan AMC-in hma lo la se tih a ni. Accommodation unit-ten an mikhual thlente register-ah an chhinchhiah ṭha em tih pawh enfiah nghal an rel.

Krismas leh kumthar vuakveta Aizawl khawpui chei chungchangah thawhho ni se an ti a; kum dang aia hma zawk, a theih chuan December thla tir aṭanga êng thei tawh tura hmalak ṭha tih niin, hmalak zel dan tur chu an sawiho leh dawn a ni.