MZP-in hnamdang thlahte'n ST chanvo an chuhve loh nan hma an la dawn

MZP inkhawmpui vawi 70-na chuan September 24, Ningani khan Darlawn Vengpui Hall-ah ro an rel a; 'The Mizo Marriage and Inheritance of Property (Amendment) Act, 2026 chu khauh taka ken kawh a, hnamdang thlahten Scheduled Tribe (ST) chanvo an chuh ve lohna atana hmalak an rel.

MZP rorelna sang ber Assembly hian agenda 11 an pass-a, chu'ng zinga paruk chu zirna kaihhnawih niin, a dang panga chu ram leh hnam kaihhnawih thil a ni a; an thu pawm zingah - 'The Mizo Marriage and Inheritance of Property (Amendment) Act, 2026 chu khauh taka ken kawh a, hnamdang thlah ten Scheduled Tribe (ST) chanvo an chuh ve loh nan hmalak ni rawh se' tih a tel a ni.

An thu pawm dangte - 'Mizoram luhka hmun hrang hrangah mi tupawh ILP check an nih theih nan MZP in hma la rawh se' tih te, 'Mizo hming hawha hnam dang sumdawn tirte na taka hremna dan sorkarin siam se, a ṭul anga dap chhuah ṭhin ni rawh se' tih te, 'Zirlaibuah Mizo ṭawng dik tak hman a nih theih nan a ṭul angin hmalak ni rawh se' tih leh 'Zofate kan inpumkhat leh zual theih nan, sikul zirlaibuah Mizo hnam hrang hrangte chanchin telh a nih theih nan MZP-in hma la rawh se' tihte chu a langsar zual an ni.

Zirna kaihhnawih an pawmte chu - 'Mizoram sorkar enkawl college hrang hrangten an mamawh bus an neih theih nan sorkarin hma la rawh se' tih te, 'CUET, NEET leh All India Competitive Exam-ah Mizo zirlaite'n exam centre chungchângah harsatna an tawh ṭhin avângin Mizoramah CBT Exam Centre dah belh a nih theih nan hmalak ni rawh se' tih te, 'Mizo ṭhalai leh zirlaite tan Career Awareness Campaign leh Nationalism Campaign a tam thei ang ber MZP-in buatsaih rawh se' tih leh 'Zirlaiten ruihhlo hman sual a hlauhawmzia an hriat theih nan MZP-in nasa zawkin Drugs Awareness Campaign buatsaih rawh se' tihte a ni.

Ram leh hnam kaihhnawih thilte chu - 'Kaladan Multi-Modal Transit Transport Project (KMTTP) -in kan ram leh hnam tana nghawng a neih theih dan zirchiana, hmalak ni rawh se' tih leh, 'Mizoram ramri dik tak humhalh a nih theih nan sorkarin hma la rawh se' tih te a ni bawk.