Zawi zawiin hma kan sawn zel ang - Education Minister

School Education minister Dr Vanlalthlana chuan nimin khan School Education complex conference hall-ah Mizoram Education Inspecting Officers’ Association member-te tana India ram puma zirna ṭha leh ṭha lo tehna 'Performance Grading Index (PGI)' chungchang zirhona a hmanpui. Minister chuan, zawi zawiin hma an sawn zel dawn thu a sawi.

Dr Vanlalthlana chuan, India rama ziak leh chhiar thiam lamah Mizoram chu a sang ber ni mah se, zirna ṭha leh ṭha lo tehnaah chuan ala san loh thu a sawi a, "Ṭan lakna tur kan ngah hle. Tunah hian kum hmasa lam aiin hma kan sawn a, hmasawn ṭha pawlah kan tel. Zirna ṭha siam turin tehfung zawng zawngah vawi lehkhatah hma kan sawn vek thei lo mai thei, zawi zawiin hma kan sawn zel ang a, kan dinhmun hi kan siamṭhat chhoh zel a ngai. Zirna a tlakchhiatna hmun apiangah sualna a pung a, zirna ṭha awmna hmunah mi thiam an tam a, mi rintlak, innghahna tlak an tam ṭhin. Kan hahdamna turin zirna ṭha kan siam a ngai a ni,” a ti.

Zirna ṭha nei turin zirtirtu ṭha neih a ngai tih sawiin Education Minister chuan, "Zirtirtu ṭha nei turin training an neih ṭhat a ngai a, zirtirtuten darkar 50 training an neihna turin ṭan lak mek a ni. Sikul lian leh naupang neih tamnaah zirlaite tan zirna boruak a ṭha a, sikul 3,974 kan neihah hian sikul parukah chauh class 1-12 an kalpui a, sikul lian kan ngahte a pawimawh," a ti a; sikul naupang nei tlemte chu an bul hnaia awmte nen kaihkawp an tum thu leh PGI tehfung chi hrang hrangahte ṭan lak a pawimawh thu a sawi.

School Education additional secretary Zothantluangi pawhin thu sawiin, PGI-in a tum bulpui ber chu NEP 2020 nen kalkawpa mi zawng zawng zirna quality ṭha pek a nih thu a sawi a, "Tun dinhmunah chuan kan zirna hi a quality a la sang tawk lo a, ṭan lak a ngai hle. PGI hi state dangte nena inelna ni mai loin, keimahni kan in enna tur a ni," a ti a; sikul tlawh tam a pawimawh thu leh sorkar sikulte chu tute tan pawha luhna tlaka siam a ṭul thu a sawi bawk.

PGI zirhona hi Samagra Shiksha state project director C Lal-thanzira’n a kaihruai a; deputy state project director Zionparlawma'n PGI a tehfung chi hrang hrangte a sawifiah a ni.