SIRD leh SMB-in thawhdunna an ziak

Rural Development & Administration minister Prof. Lalnilawma pisaah nimin khan SIRD leh Synod Mission Board (SMB) chuan Mission Development Training Centre (MDTC)-a thawkho turin thawhdunna thuthlung, memorandum of understanding (MoU) an ziak.

Prof. Lalnilawma chuan, SMB leh SIRD-in thawhhona an nei thei tur chu lawmawm a tih thu a sawi a, "He thawhhona hian rawngbawlnaah kawng zau zawk a siam ka beisei a, training hmanga eizawnna pek hi rawngbawlna kawng pakhat niin, eizawnna siamtu ni zel turin theihtawp chhuah a ṭul a ni, " a ti.

RDAD Minister chuan, "Kan eizawnna chuan hmasawnna a siam tur a ni," a ti a; mithiamte nen training ṭha leh eizawnna tlak thiamna trainer-ten an neih theih nan mawhphurtute chu theihtawp chhuah tur leh mipui chawikan nan thawhho zel a beisei thu a sawi.

SIRD leh SMB thawhhona kaltlang hian MDTC, Bualpui North-ah training kalpui tur a ni a; training course module design, question paper set leh evaluation-ahte SIRD chuan MDTC hi a puibawm dawn. SIRD aṭangin qualified resource person training pe turin an kal ang a, training completion certificate course hi SIRD Director leh SMB Secretary hminga pek chhuah tur niin, MDTC-in training koh leh hmun hma ruahmanna siamah mawh an phur dawn a ni.