Home Minister hoin Zakaria an râl; Report peih thawkhat a ni tawh - HM
Home minister K Sapdanga hoin adviser to chief minister TBC Lalvenchhunga, MLA leh Champhai South bialtu MLA Lt Col. Clement Lalhmingthanga ten September 20, 2026-a mi kut tuara thi Zakaria Lalhriattluanga (29), New Builum chu September 26, Inrinni khan an inah an râl. Sapdanga chuan, Zakaria thih dan chhuina report (chargesheet) chu September 2026 chhungin court-ah thehluh tum a nih thu a sawi.
Home Minister chuan, Zakaria chunga thil thleng chu mi tinin pawi an tih thu leh sorkar pawhin pawi a tih thu a sawi a, "Sorkarin hrehawm a ti a, Zakaria nu leh pa leh a chhungte zawng zawng a lainat tak zet. State sorkar aiawha ral tura rawn kal kan ni lo a, Mizo kan nihna anga kan lainatna rawn lantir turin hotute nen inráwn khawmin kan rawn kal a ni," a ti.
Zakaria Lalhriattluanga chunga pawikhawihna a thlen aṭanga darkar 3 chhungin police-te'n pawikhawihtute an man thu sawiin K Sapdanga chuan, "Sorkar anga hmalak theihnaah rang taka hmalak nghal a ni a, dan pangngaiah court-a chargesheet thehluh nan ni 90 phût ni ṭhin mah se, an inpeih thawkhat tawh," a ti a; police hnu chhuina report chu September 2026 chhungin court-ah thehlun hman beisei a nih thu leh, pawikhawihtute'n an thil tih mil tâwka hrem an phu thu a sawi.
All Mizo Ex-Service League president Lt Col. Clement Lalhmingthanga, MLA chuan, Zakaria chu ram leh hnam tana inpe, sipaia ṭang mek a ni a, ram tana mi ṭangkai leh uiawm a nih thu a sawi a, "Ram leh hnam tana a inpek ang chiahin a ṭhianpa chhan nan ṭhian chhan thih ngamin a nun a hlan hi chawimawi tlak a ni," a ti.
Zakaria pa VL Duailova chuan, Home Minister leh a ṭawiawmtute'n an râl chu an lawm thu sawiin, "Ka fapa hi kan chhungkaw innghahna ber a ni a, kan in sak lai pawh zo hman loin min kalsan a ni. Ni ruk chhunga thubuai chhui chhuah a ni thei hi lawmawm ka ti," a ti a; a fapa thihnaah rorelna dik tak a phût thu a sawi.
Zakaria Lalhriattluanga râlna atan hian Home Minister leh MLA pahnihte hian pawisa an thawh khawm a, chungte chu an pathum aiawhin TBC Lalvenchhunga'n a hlan. Râlna inhlannaah hian New Builum VC member te, YMA leh pawl dang hruaitute leh mi dang eng emaw zat an tel a ni.