Ni 3 chhung bank khâr a ni dawn; SBI leh MRB branch-te niminah hawng

United Forum of Bank Unions (UFBU) chuan vawiin September 28 aṭanga September 30, Nilaini thlengin India ram pumah lungawi lohna an lantir dawn a; hei hi All India Regional Rural Bank Employees Association (AIRRBEA) pawhin an zawm dawn avangin Mizorama bank-te pawh an inkhar dawn.

Ni thum chhung bank-te khâr a nih dawn avangin sorkar laipuia Finance Ministry chuan public sector bank-te leh regional rural bank-te chu mipui dàwr theih tura inhawng turin a hriattir a; he thuchhuak ang hian nimin khan Mizoramah pawh public sector bank, regional rural bank leh old-generation private sector bank-te an inhawng.

Mizoramah chuan hriat theih chinah nimin khan niléngin State Bank of India branch-te leh Mizoram Rural Bank branch-te mipui tan dawr theih turin an inhawng. Mahse, Vanglaini palaiin a tlawh bank-ahte chuan dawrtu an tam lo hle a, tlem azawng an awm. Scheduled bank zinga mi Mizoram Cooperative Apex Bank erawh an inhawng ve lo thung.

Sorkar laipui aṭanga thuchhuak, Pathiannia bank hawn tura tih a ni hi Council of Churches in Mizoram leh Central YMA chuan ṭha an tih loh thu leh, Mizoramah chuan Pathiannia bank hawng tura tih ni ve lo se an duh thu an tarlang a ni.

Nawrh huaihawttu UFBU hian chawlhkar khata ni nga hna thawh te, performance linked incentive (PLI) hmanlai siamṭhat leh thil dang dang an phût a; an thil phût tihlawhtling tura thuneitute nawr nan September 11, 2026 khan lungawi lohna an lantir tawh.

Lungawi lohna an lantir hian awmzia a la neih loh avangin September 28-30, 2026 chhung bank an khâr dawn a; vawiin chawhma dar 10 hian bank-a thawkte chu SBI Main Branch kawtah an pungkhawm ang. Ni thum chhung bank khàr hian awmzia a neih loh zel chuan October 26, 2026 aṭangin tiam chin awm loa lungawi lohna lantir an tum bawk.