KHAWTHLIR

Thisen pe

September 26, Inrinni khan KṬP, Bawngkawn Pastor Bial chuan Synod Hospital tan thisen unit 82 an pe a, petute mipa 75 leh hmeichhia pasarih an ni a; KṬP, Aibawk Bial pawhin ZMCH tan unit 45 an pe a, petute mipa 39 leh hmeichhia paruk an ni. Inrinni vek khan Ramhlun North Branch YMA-in Civil Hospital, Aizawl tan thisen unit 40 pein, petute mipa 37 leh hmeichhia pathum an ni a; Adventist Youth Federation, Lunglei pawhin Lunglei Civil Hospital tan unit 18 pein, petute mipa 14 leh hmeichhia pali an ni.

Kuhva rah man

Assam Rifles sipaite chuan September 24, 2026 khan Champhai Ruantlang huam chhunga kudam pathum an endik a, Myanmar aṭanga dan loa lak luh nia hriat kuhva rah ip 1,571 (kg 1,25,680) leh poppy seed ip 424 (kg 25,440) an man. Kuhva rah leh poppy seed an mante hi a vaiin cheng vbc 17.89 vel hû a ni a, Champhaia Customs hnenah an hlan.

Rabies Day camp

Vawiin hi ui â hri venna ni, World Rabies Day a ni a; he ni pual hian AH&Vety department, State Veterinary Council leh Indian Veterinary Association, Mizoram te chuan September 26, Inrinni khan Zemabawk North, Salem Veng, Ramrikawn leh Phunchawngah a thlawna ui â hri danna pek rûnpui Free Anti-Rabies Vaccination Camp an buatsaih a; ui leh zawhte 402 hnenah hri danna pek a ni.

Faina hnatlang

Khawzawl District Sanitation Task Force hmalaknain September 26, Inrinni khan Khawzawl district-a VC tinah Swachhata Hi Seva pualin faina hnatlang huaihawt a; mi ṭhahnem tak thawk chhuakin, kawng dung leh tui luankawra bawlhhlawhte leh vantlang inthiarna hmunte tihfai a ni a, kawng bâ sâm fai a ni bawk.

TT board pe

Adviser to chief minister Dr Lorrain Lalpekliana Chinzah, Lawngtlai East bialtu MLA chuan September 26, Inrinni khan Lairam Rescue Centre leh Lawngtlai District Jail hnenah table tennis thlêng (board) pakhat ve ve pe. Dr Lorrain Lalpekliana chuan, rilru leh taksa hrisel nei turin insawizawi ṭhat a pawimawh thu a sawi.

Airport endik

Mizoram State Persons with Disabilities (PwD) commissioner Vanlaldiki Sailo hoin Accessible India Campaign Audit Team chuan September 25, 2026 khan Lengpui Airport leh Lengpui Community Health Center te an tlawh a, rualbanlote tana awlsam zawka luh leh chhuah theihna siam a nih leh nih loh an endik. Endiknaah hian PWD leh DIPR aiawh te, mithiamte leh rualbanlo pawl hrang hrang aiawhte an tel a ni.

High school sports

Vawiin hian Aizawl District Secondary School Sports 2026 ṭan a ni dawn a, Aizawl district-a high school 64 aṭangin zirlai infiammi ṭhahnem tak an tel dawn. Sports-ah hian infiamna chi ruk - athletics (boys & girls), football (boys), volleyball (boys & girls), judo (boys & girls), kalchhet (boys) leh kawikah (girls) hmangin zirlaite an inel dawn a ni.