World Pharmacists Day hman a ni

September 25, Zirtawpni kha World Pharmacists Day a ni a, Pharmacy Council of India (PCI) leh Mizoram State Pharmacy Council (MSPC) chuan Vaivakawn Cultural Centre-ah an hmang.

Pharmacists Day hmannaah hian Health Services joint director (Food and Drug Adminustration) F Lalliantluanga'n fuihna thu a sawi a; tun hnaiah khuh damdawi (Codeine Syrup), chu a tuamna (label) thlakin food supplement anga zawrh a awm thu sawiin, "Hetiang hi Mizorama a lo luh dan leh a darh dan Central YMA nen tangrualin chhui zui mek a ni," a ti.

Khuh damdawi, a label thlaka food supplement anga zawrhte chu LIV-PLUS Syrup, Livo-52 Syrup leh Zymoford te a nih thu sawiin, thil pawi tak a nih avangin, heng damdawite hi an hmuh apiang chu man nghal tur a nih thu F Lalliantluanga chuan a sawi.

World Pharmacists Day hmannaah hian pharmacist (registered) 450 chuang an tel a; Mizoram Pharmacists Association president Dr Zothanpuia'n kumina Day thupui 'Empowering Pharmacists for Healthier Future' (Hma lam huna hriselna tha zawk neih theihna tura pharmacist-te thâ tihchak) tih a sawi a ni.