Lalsavunga Park enkawltu cancel turin ngen; Oct. 3 aṭangin an duh danin hma la dawn

Hlimen Local Council & All NGO chuan, Lalsavunga Park enkawltu contractor chungchanga sorkara an thil phûtte tihhlawhtlin a nih loh chuan October 3, 2026 aṭangin Lalsavunga Park enkawl chungchangah ṭha an tih danin hma an la dawn. Hlimen hian Park enkawltu contractor rawihna titawp turin sorkar an phût a ni.

Hlimen khawtlang chuan thuchhuah siamin, Lalsavunga Park chu September 1, 2026 aṭangin mipui tlawh theih loha an khâr ṭan thu an tarlang a, "Park tlawh tum ni tin mi 50-100 an la awm reng a, a zatve aia tam mah hi state páwn aṭanga lo kalte an ni," an ti.

Park enkawl mumal loh vanga khualzinte hawtir a ngai chu pawi an tih thu sawiin Hlimen khawtlang chuan, "Park enkawl mumal loh leh thianghlim loh vanga hnar kîr ngaia hmalak a ngai hi ram leh hnam ang pawhin a mualphothlak," an ti a; Park enkawltu contractor rawihna sorkarin a tihtawp (cancel) hma chuan Park an khâr dawn thu an tarlang.

Hlimen LC leh NGO-te chuan, "Lalsavunga Park enkawltu contractor hian Park enkawlnaah sorkar nen an inremna tam tak a bawhchhiat avangin a rang thei ang berin inremna aṭang hian inhnûkdâwk turin kan ngen a, sorkar pawhin agreement zâwm lo contractor hi a rang lama cancel turin kan ngen nawn leh bawk," an ti.

An ngennain awmzia a neih loh chuan October 3, 2026 aṭangin Lalsavunga Park-ah ṭha an tih danin hma an la dawn tih Hlimen khawtlang chuan an tarlang a ni.