April-July 2026 chhungin Mizoramah ri hriatnaa harsatna nei mi 298 hmu

Nimin September 28 kha World Day of the Deaf (Bengngawngte Ni) a ni a, National Programme for Prevention & Control of Deafness (NPPCD) leh RIPANS Hospital huaihawtin RIPANS Hospital-ah hman niin, kumin April-July chhunga screening camp-ah ri hriatnaa harsatna nei mi 298 hmuh chhuah a nih thu tarlan a ni.

World Day of the Deaf hmannaa NPPCD consultant Dr Lalthanmawii Khalthang tarlan danin, NPPCD hnuaia district pakuaa thawktute chuan awarerness campaign leh screening camp an buatsaih ṭhin. April-July 2026 chung khan NPPCD-in Mizoramah a thlawna inentirna ṭum 56 an buatsaihah mi 1,455 an inentir a, ri hriatnaa chak lo leh harsatna nei mi 298 hmuh chhuah a ni.

April-July 2026 chhungin NPPCD hnuaiah mi 11,435 en niin, bengngawng mi 428 enkawl an ni a, benga harsatna nei mi 128 zai an ni. Mi 22 chu bengdár vuahsak an ni a, mi 777 chu bengdár dawng tura tih an ni bawk. Bengdar mamawhte pek an nih theih nan Rashtriya Bal Swasthya Karyakram, NILD-NERC ALIMCO te nen an thawkho.

Bengngawngte Ni hmanna inkhawm hi NPPCD state nodal officer Dr Robert L Khawlhring, HME deputy director-in a kaihruai a; khuallian NHM Mizoram mission director Dr R Lalchhuanawma leh khualzahawm RIPANS Hospital medical superintendent Dr H Lalrinmawia ten thu an sawi.

Dr R Lalchhuanawma chuan, World Day of the Deaf chu kum 1958-ah hman ṭan a nih thu sawiin, "He ni hian a tum ber chu, bengngawngte harsatna hriatthiampui tur leh bengngawnna titlem tura mipui hnena zirtirna zau zawka thehdarh a ni... Bengngawnna thlentu hrang hrang lakah inven fimkhur a ngai a, beng natnate bakah, ri hriatna tichak lo thei damdawite leh ri bengchheng nasa lakah inthiar fihlim a pawimawh," a ti.

Inkhawmah hian Home Mission School, Ferrando High School, Lungbial Middle School leh Zemabnawk Primary School-II zirlaite an tel a; RIPANS Hospital-a ENT specialist Dr Lalramnghaki'n thupui sawifiahin, benga harsatna thlen thei laka inven dan tur naupangte a zirtir a ni.