KHAWTHLIR

HBC-in thisen pe

Hrangbana College NSS unit chuan nimin khan an college-ah thisen pek an huaihawt a, Civil Hospital, Aizawl tan thisen unit 48 pe in, petute mipa 37 leh hmeichhia 11 an ni.

A thlawna inentirna

Assam Rifles chuan September 26, 2026 khan Siaha district-a Noaotla (Niawhtlang) khuaah a thlawna hriselna dinhmun enfiahna an buatsaih. Medical checkup-ah hian mi 328 inentirin, puitling mipa 102 leh hmeichhia 165 bakah naupang 61 an ni a; an mamawh ang damdawite a thlawnin an pe nghal a ni.

Chawimawina hlan

Lawngtlai bawrhsap Donny Lalruatsanga chuan nimin a pisaah 'FAO 100 Women Heroes in Agrifood Systems and Rural Development' zinga thlan ZT Lalrithangi, Sangau hnenah chawimawina thuchei leh Rs 10,000 a hlan. FAO chawimawina dawngtur hian India ram aṭangin mi pahnih an lang a, World Food Forum Event, FAO Headquarters, Rome, Italy-ah October 12-16, 2026 khian award sem a ni ang.

e-Office zirho

Nimin khan PWD Engineer-in-Chief conference hall-ah National Informatics Centre kaihhruaiin e-Office hman dan tur PWD-a thawktute'n an zir. PWD E-in-C David Sapzova'n a hmanpui a; e-office chu October 1, 2026-ah hman ṭan a nih dawn avangin training chhunga thiam hman turin kal khawmte a chah.

Mission Shakti

Kolasib district bawrhsap H Dolianbuaia kaihhruaiin nimin khan District Level Implementing Committee on Mission Shakti an ṭhukhawm a; October - November, 2026 chhunga hmalak dan tur ruahmanna (proposed activity/action plan) tlangzarh niin, hmalak dan turte an sawiho.

Swachhata Hi Seva

Khawzawl District Sanitation Task Force chuan nimin khan DC K Vanlalṭhiana hoin Swachhata Hi Seva denchhenin September 30, 2026 khian faina lama thawktu (sanitation worker)-te tan free health checkup leh October 1, 2026 khian 'Ek Din, Ek Ghanta, Ek Saath' pualin sikul naupangte nen Zaingen Hall hnuai bazar tihfai hnatlang neih an rel.