Police-in Pathianni-ah lirthei 364 man

Aizawl Traffic Police chuan September 27, Pathianni khan Aizawla hmun hrang hrangah Special Drive neiin lirtheite an endik a, lirthei dan bawhchhia 364 an man.

Traffic Police tarlan danin, Special Drive hi lirthei khalh leh hman fimkhur loh vanga dan bawhchhiatna leh lirthei chetsualna a tlem zawk theihna tura buatsaih ṭhin a ni a; September 27 bikah chuan chawhnu dar 2:45-ah ṭanin, Aizawla hmun 52-ah an kalpui a ni.

September 27-a Special Drive-a lirthei dan an man zinga 197 chu helmet khum loa two wheeler khalhte an ni a, man zawng zawng 364 aṭangin 54.12% a tling. Police-te'n an man tam ber dawttu chu driving license nei loa lirthei khalh niin, mi 69 (18.96%) a ni.

Aizawl Traffic Police Media Cell chuan, Aizawl khawpui a him a, thlamuang taka mi tinin kawngpui an hman theih nan Special Drive an kalpui zel dawn tih an tarlang a, "Dan pawisak lohna hian mi dang tan harsatna nasa tak a thlen ṭhin avangin dan zawm kawnga ṭan la thar zel turin kan inngen a ni," an ti.