Lungleia lirthei tlan dan leh hûn dan chungchang thuneitute'n sawiho

Lunglei Municipal Council (LMC) hnuaia Traffic and Transport Coordination Committee (TTCC) chu an chairman K Lalrinawma, LMC vice chairman hoin nimin khan LMC BoC Meeting Hall-ah an ṭhukhawm a; Lungleia lirthei tlan dan leh hûn dana hmalakna tur leh lehkha lutte an ngaihtuah.

K Lalrinawma chuan, Lunglei khawpuia lirthei tlan dan leh hûn dan him leh felfai a awm theih nan LMC-in theihtawpin hma a lak reng thu a sawi a, "LMC-in enforcement staff a neih bakah, lirthei hûn man (parking fee) tling khawm aṭangin traffic warden pathum rawih a ni," a ti.

Ṭhutkhawmah hian LMC chief executive officer Lalhmansanga, Police, Public Works department, Transport leh Information & Public Relations department hotu te, MJA Lunglei district leh Lunglei YMA Sub-Headquarters aiawhte an tel.

Sorkar pisa, kohhran leh pawl hrang hrang aṭanga lirthei dahna hmun (parking) leh dinna hmun (stand) dilna leh stand luah man chungchanga lehkha lutte thlirho a ni a, a ṭul anga bawhzui dan tur ruahman a ni.

LMC BoC ṭhukhawmin kum 2026 Krismas vuakveta him leh nuam zawka mipui an veivah theihna tura lirthei tlan phal lohna, No Vehicle Zone siam tura a rel leh, TTCC-in ruahmanna siam tura a ruat anga hma lak dan tur ruahmanna tlangpui sawiho a ni bawk.