World Rabies Day hman a ni

AH&Vety department, Mizoram State Veterinary Council (MSVC) leh Indian Veterinary Association (IVA) Mizoram te huaihawtin nimin khan BSI Hall, Aizawlah World Rabies Day hman a ni a, Vety minister C Lalsawivunga'n a hmanpui.

Vety Minister chuan, India ram chu ui a hri (rabies)-in a chen chilh ram a nih thu a sawi a, "Khawvel huapin ui a hri (rabies) vanga thihna 36% lai chu India rama thleng a ni. He natna hi virus chi khat, Lyssa virus-in a thlen a ni a, ram hrang hrang 150 chuangah kum tinin mi 59,000-in an thihpui ṭhin a, heng zinga 95% chu Asia leh Africa ram aṭanga report a ni," a ti.

WHO-in ui â natna umbo turin nasa taka ṭan a lak thu sawiin C Lalsawivunga chuan, "Kum 2030-ah chuan khawvel ram hrang hrangah umbo tum a ni a, hemi atan hian thawhhona ṭha a pawimawh. Ui a hri nuai bo tur hian mi tinte'n mawhphurhna kan nei," a ti a; mipui hnenah ui leh ran dangte khuahkhirh a, enkawl dan dikte inzirtirna uar lehzual a ṭul thu a sawi.

World Rabies Day pual hian Vety department, MSVC leh IVA Mizoram te chuan September 26, Inrinni khan Aizawla veng pali - Zemabawk North, Salem Veng, Ramrikawn leh Phunchawngah te a thlawna ui a hri danna pek beihpui, Free Anti-Rabies Vaccination Camp an buatsaih a; anti-rabies vaccine dose 407 pek niin, ui 358 leh zawhte 49 hri danna an pe a ni.