Lái hnam puan chungchang zirho a ni

Aizawl West College-a Department of History leh Research Development Cell – IQAC te chuan nimin khan an auditorium-ah 'Evolution of Textiles in Mizoram: A Focus on Lai Textile Heritage' tih thupui zirhona an buatsaih a; Lai Autonomous District Council (LADC) chief executive member C Lalsawmzuala'n a hmanpui.

Zirhona hawn inkhawm hi Aizawl West College (AWC)-a Department of History HoD Dr R Lalsangpuii'n a kaihruai a; Dr Samuel VL Thlanga, AWC-in thupui sawizauna hun a hmang. Hrangbana College-a associate professor Dr Rosaline Varsangzuali, folk artist Lalduhawma leh research scholar S Lalruatfela ten thupui an sawi. Lai hnam thuam chi hrang hrang entir a ni bawk.

C Lalsawmzuala chuan, Zo hnahthlak hrang hrangte'n an hnam thilte chu innêk nan a hmang lo a, inpumkhatna atan an hman a ṭul thu sawiin, "Chu chuan national integrity thlengin a nghawng thei a ni," a ti a; sorkar laipui puihna hmangin LADC chhungah Lai Textile Heritage Village din dan zawn a tum thu a sawi.

LADC CEM chuan, an thlirna aṭang chuan Lai hnam chu an chungnung deuha hriatna an nei tih sawiin, "Lai hnam puantah kum 1855-a mi kha Victoria and Albert Museum, London, United Kingdom-ah a awm a, hetah hian silk an lo hmang daih tawh. Hnika, Khuptangtial, Nawnthum hni, Chawngnak, Canlo leh Biarpi pawnzia ropui tak tak lanna chu Lai hnam nunphung leh kut themthiamna tilangtu a nih mai bakah, hnam ropui an nihzia tarlangtu an ni," a ti.