Thla 8 chhunga ruihhlo vanga man Mi 930 zingah ram dang mi 111 tel

Home minister K Sapdanga chuan, kumin January aṭanga August thla thleng khan NDPS Act tlawhchhanin thubuai 635 ziah luh a ni a, mi 930 manin, chung zinga mi 111 chu ram dang mi an nih thu a sawi.

September 28, Thawhṭannia Assembly Annex Conference Hall-a 'State Action Plan to Combat Drug Menace 2026-2029' tlangzarhnaah K Sapdanga chuan, "Jan-Aug, 2026 chhungin NDPS Act hnuaiah case 635 ziah luh a ni a, hemi kaihhnawiha man mi 930 zinga mi 111-te chu ram dang mi an ni. Ruihhlo kaihhnawih man hlut zawng belhkhawm chu cheng vbc 846 chuang a ni," a ti.

K Sapdanga chuan, "Ruihhlo zuarte chungah dan anga na taka hremna lek zel a ṭul rualin, ruihhlo ngaite an ṭhat chhuah leh theih nan dawhtheihna leh lainatna nena enkawl a ṭul," a ti a; ṭhalaite ruihhlo laka an fihlim theih nan zirna-inah drug awareness campaign uar lehzuala kalpui a ṭul thu a sawi.

Home Minister chuan, ṭhalaite chu an hma lam hun ruihhloin a tihchhiat loh nan intiam thar tura a chah rualin, nu leh pate chu an fate ngaihven turin a chah a; ruihhlo donaa lungrual taka thawhhopuiah khawtlang hruaitu, pawl leh kohhran hruaitute a sáwm. Ruihhlo tawlh chhut chah a nih theih nan ramri-ahte nasa lehzuala chêt tum a nih thu a sawi bawk.