Mizoram leh Manipur inkara tlan tur bus Transport Minister-in a vailiam

Transport minister Vanlalhlana chuan nimin khan Chaltlanga Transport pisa kawt aṭangin Mizoram leh Manipur inkara tlan tur bus a vailiam. Bus hi October 1, naktukah a tlan ṭang ang.

Mizoram leh Manipur kàr tawna bus tlantirtu tur chu VK Tawna Travels an ni a, mi 21 ve ve chuan theihna bus pahnih an tlantir dawn. Sairang leh Lamka inkarah tlantir a ni dawn a, heng khaw pahnih inkar hi km 360 vela hla niin, darkar 12 vel thang tura ngaih a ni.

Vanlalhlana chuan, Mizoram chu Zo hnahthlakte inpui a nih thu sawiin, Manipur-a chi leh chi inkara buaina thleng vanga zin veivah kawnga Zo hnahthlakte'n harsatna an tâwk ṭhin hi a pawi a, he bus service tur hian Manipur leh Mizoram inkara zin veivakte harsatna thui tak a sutkian ka beisei," a ti.

Transport Minister chuan, tlâng hrang hranga cheng Zo hnahthlakte an inlungrual a pawimawh thu sawiin, Mizoram leh Manipur inkara bus tlan tur chu Zo hnahthlakte inunauna, inluangrualna leh inpumkhatna ṭha zawk siamtu ṭangkai tak a nih ngei a beisei thu a sawi.

VK Tawna Travels hotu Siamnunlian Valte chuan, inter-state bus service an buatsaih dan a sawifiah a; adviser to chief minister H Ginzalala, MLA-in thu a sawi bakah, Transport director R Lalrammawia'n inter-state bus service chungchanga hriat tur pawimawhte a tarlang.